Post longa paŭzo, interalie pro sanproblemoj kaj la kovim-pandemio, Martin & la talpoj revenas en 2023 kun la elektra albumeto Vestiĝoj, konsistanta el ses pecoj en bone rekonebla stilo de emocia sendependa/alternativa pop-roko. Kiel ĉiam temas pri nur originalaj verkoj kun teksto kaj muziko verkitaj kaj komponitaj de Martin. La kantaĵoj esploras temojn kiel homaj rilatoj, disiĝoj, decidaj vivmomentoj kaj kritiko de religioj kaj superstiĉoj.

La kantaĵoj de la albumeto estis registrataj iom post iom dum pluraj jaroj, plejparte de Martin mem en sia dormĉambro, kaj por la unua fojo li ankaŭ faris mem la miksadon. Aldonaj muzikistoj estas la du delongaj kunlaborantoj Johan Lagerdahl (basgitaro) kaj Mattias Levin (drumo), kaj krom ili Nikko Harrison (drumo), Robin Hawkins (basgitaro) kaj esperanto-artista kolego Eric Languillat/i.d.c. (sintezilo), kiuj ĉiuj registris siajn partojn en siaj hejmoj aŭ provludejoj.

Vestiĝoj estas elektra albumo kies ĉiuj ses pecoj estas ludataj kun plena rokbando. Laŭ la planoj ĝi estos sekvota de akustika albumo kies registriĝo jam komenciĝis.

Martin & la talpoj en ĉi tiu albumeto estas:
Tekstoj kaj muzikoj: Martin Wiese

Martin: Gitaroj, baso, tamburino, manfrapoj kaj voĉoj
Mattias Levin: Drumo en kantoj n-roj 1, 2, 3, 4 kaj 5
Johan Lagerdahl: Baso en kantoj n-roj 3 kaj 4
Eric Languillat: Sinteziloj en kanto n-ro 3
Robin Hawkins: Baso en kanto n-ro 1
Nikko Harrison: drumo en kanto n-ro 6

Registrita de la diversaj partoprenantoj en siaj hejmoj en Stokholmo, Sigtuna, Offenbach kaj Bristol.

Miksita de Martin el sia dormĉambro en Stokholmo.

Mastrigita de Triboulet en Studio de la Trappe, Donneville, Okcitanio/Francio.

Grafika arto por kovrilo: Max Elbo